Boy Ecury
- E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.
_Ecury_(1922-1944).jpg)
| Pais di nashonalidat | Reino Hulandes  |
|---|---|
| Nòmber di dilanti | Segundo, Jorge |
| Fam | Ecury |
| Fecha di nasementu | 23 aprel 1922 |
| Lugá di nasementu | Oranjestad |
| Fecha di fayesimentu | 6 novèmber 1944 |
| Lugá di fayesimentu | Waalsdorpervlakte |
| Kousa di morto | gunshot wound |
| Lugá di entiero | Oranjestad |
| Ruman(nan) | Nydia Ecury |
| Okupashon | luchado di resistencia |
| Collection | Netherlands Institute for Sound and Vision |
| Inventory number | PGM4011933 |
Segundo Jorge Adelberto (Boy) Ecury (☆ 23 di april 1922 na Aruba - † 6 di november 1944 na Waalsdorpervlakte, Hulanda) tabata un Arubiano luchado den resistencia durante Guera Mundial II. Ecury ta e unico Arubiano conoci pa a lucha den e resistencia.
Bida[editá | editá fuente]
Ecury a nace den un famia catolico grandi, di mayornan Nicasio Segundo 'Dundun' Ecury y Ana Paulina Wilhelmina Ernst. Nicasio Ecury tabata un comerciante exitoso, yiu di Eugenio Candido cu a nace den sclabitud. [1] E cas unda e famia a biba den bario di Rancho, a keda restaura y ta unda e Museo Arqueologico di Aruba ta lokalisa. Ecury a nace di shete yiu di en total diestres. Un di su rumannan, Nydia Ecury, tabata un docente, autor, traductor y actriz conoci.
Su mayornan a manda Boy Ecury y su rumannan studia na Hulanda na edad jong. Ecury a gradua na 1937 na e St Louis Instituut na Oudenbosch, Haldenberge, Noord-Brabant.[2] E tabata bibando na Tilburg na momento cu e invasion di e armada Aleman na Hulanda a tuma luga.
Resistencia[editá | editá fuente]
Ecury, enfureci door di e discriminacion, violencia y inhusticia cu e Di Dos Guera Mundial a trece na Hulanda, a dicidi for di comienso di drenta e resistencia contra e invasion Aleman.
Hunto cu compañeronan di Corsou Luis de Lannoy y Delfinicio Navarro, Ecury a ehecuta diferente operacion pa sabotea e invasion Aleman na Hulanda. Entre otro, nan a causa explosion di trucknan Aleman, treinnan pa sali foi nan rails y tabata yuda sconde hendenan persegui door di e invadonan nazi y pilotonan aliado na Tilburg. Su grupo tabata comunica na Papiamento/u. Ecury a keda na Tilburg te cu 1942, ora cu e situacion a bira mucho peligroso p'e. Door di su color scur, e tabata facil pa reconoce, locual tabata haci su trabou den resistencia extra peligroso. El a sconde na diferente adresnan na Oisterwijk (Noord-Brabant), Delft y Rotterdam. Na Oisterwijk e tabata parti di un otro grupo di e resistencia. [2]
Na 1944 el a join un asina yama 'knokploeg' na Den Haag. Kees Bitter tabata e persona cu a traiciona de Lannoy y a causa cu nan a arrest'e 10 di februari 1944. Ecury a purba di yuda de Lannoy scapa for di prison na Utrecht, pero el a faya. Un par di luna despues, Bitter lo traiciona Ecury tambe. [2]
Morto[editá | editá fuente]
Saliendo for di misa na Rotterdam dia 5 di november 1944, nan a aresta Ecury pa posesion di arma di candela. A transporta Ecury pa e Pentitentiaire Inrichting Haaglanden, miho conoci como 'Oranjehotel' (Polizeigefängnis, bou di control nazi) na Scheveningen.[2] Eynan, nan a interroga y tortura Ecury pa informacion clave cu potencialmente lo hiba nazis na aresta otro miembronan di resistencia. Apesar di e tortura, Ecury no a duna nan e informacion. Nan a condena Ecury pa morto y dia 6 di november 1944 a fusil'e na Waalsdorpervlakte, un zona di duin den cercania di Den Haag. Tres aña a pasa prome cu otronan lo descubri su curpa. Su tata a laga transporta e curpa pa Aruba, unda a der'e cu honor militar.[2]
Reconocemento[editá | editá fuente]
Aruba[editá | editá fuente]
Dia 6 di november 1949 a devela un estatua na honor di Ecury na Oranjestad, Aruba. E estatua ta keda riba Plaza Boy Ecury na Lloyd G. Smith Boulevard.[3][1]
E archivo di famia Ecury e keda digitalisa pa Archivo Nacional Aruba (ANA) y Nederlands Instituut voor Oorlogsdocumentatie.
Den añanan '80, Ted Schouten, cineasta y famia di Ecury, a produci un documentario pa TeleAruba tocante Boy Ecury. El a produci un buki tambe tocante Ecury durante e temporada aki. Na 2003, gobierno di Aruba a republica e buki bou di e titulo Boy Ecury, een Antilliaanse jongen in het verzet.
Durante e Aruba Art Fair 2022 na San Nicolas a devela un mural cu su imagen na Filomena College, crea pa Esmeralda Kelly.[4]
Corsou[editá | editá fuente]
Na su memoria a graba su nomber riba un di e campananan di e carillon, conosi como “De vier Koningskinderen”, cu ta instala desde aña 1952 riba e edificio di Museo di Corsou na Otrobanda, Corsou.[5]
.jpeg)
Na Corsou tin desde 1946 un caya cu e nomber Boy Ecuryweg.
Hulanda[editá | editá fuente]
Cuarenta aña despues di su fayecemento, na 1984, Hulanda a otorga Ecury e Cruz Conmemorativo di Resistencia (Verzetsherdenkingskruis) pa su actonan heroico durante guera.
Na 2003 cineasta Frans Weisz y productor Sherman de Jesus, hunto cu Ted Schouten, a produci un pelicula tocante e bida di Boy Ecury. Actor Steve Hooi ta actua den e rol di Boy Ecury, mientras actor Felix de Rooy ta actua den e rol di Dundun Ecury, tata di Boy. [6]
Na 2010 a nombra un caya na honor di Ecury na Oisterwijk, unda Ecury a biba y sconde un temporada durante guera.[2] Den e pelicula hulandes di 2014 tocante e heroenan di resistencia di Oisterwijck, titula Schaduwspel, e rol di Boy Ecury ta wordo hunga dor di e actor Jennau-Jean Louis.
Na 2016, municipio di Amsterdam a pidi ciudadanonan pa propone nomber pa e brug aki cu tabata sin nomber desde su construccion na 1990. E proposicion ganador di ciudadano Lex Uittenbogaard (naci na Aruba) tabata pa yama e brug pa Boy Ecury. Den e parti di e ciudad unda e brug aki ta situa, tin diferente luga cu ta carga nomber di un heroe di e resistencia den Segunda Guera Mundial. A aproba e proposicion aki y desde 2017 e brug na Amsterdam Nieuw-West ta yama Boy Ecurybrug. [7][8] Na 2024 municipio di Den Haag ta batiza un pasahe entre Wilhelmina van Pruisenweg y e Schenkkade na Bezuidenhout den Boy Ecurypassage.[9]
Buki y pelicula[editá | editá fuente]
- Boy Ecury, een Antilliaanse jongen in het verzet, Ted Schouten, ISBN 90-5730-242-X, Walburg Pers, 1985.
- Boy Ecury, een Antilliaanse jongen in het verzet, documentario di Ted Schouten, 1985.
- Boy Ecury, pelicula dramatisa, dirigi pa Frans Weisz, 2003. Gouden Kalf 2003; Columbine Award USA 2004.
- Guia di Investigacion historico di Boy Ecury, Daniella Britt, Fundacion Amigonan di Archivo, Aruba 2019.
Mira mas[editá | editá fuente]
Link externo[editá | editá fuente]
|
Mira tambe e kategoria Boy Ecury di Wikimedia Commons pa mas dato mediatiko tokante di e tema aki. |
Fuente, nota i/òf referensia
|