Hipolito Ocalia
- E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.
Pais di nashonalidat | Antias Hulandes |
---|---|
Fecha di nasementu | 22 yüli 1916 |
Lugá di nasementu | Kòrsou |
Fecha di fayesimentu | 20 aprel 1984 |
Lugá di fayesimentu | Kòrsou |
Okupashon | pintor, visual artist |
Obranan den kolekshon | Stedelijk Museum Amsterdam, Museo di Kòrsou |
Status pa derecho di autor como creador | obra protehi pa derecho di autor |
Hipolito Max Ocalia (☆ 22 di yüli 1916 na Kòrsou - † 20 di aprel 1984 na Kòrsou), mihó konosí komo Politu Pintor, tabata un artista visual antiano. E ta e nèstòr di pintura antiano.[1]
Biografia[editá | editá fuente]
Hipolito Ocalia a nasé i lanta den un famia humilde di Bandariba, den bario di Kunuku Fel.[2] Komo mucha el a kuminsa dibuhá i pinta loke e tabata mira, asta usando tapa di bleki pa pinta ariba.[1] E tabata un talento natural i outodidakto ku tabata konsiderá pintamentu un ofishi. Pokopoko i sin guia of sosten finansiero el a bai desaroyando su propio estilo den arte naïef.[3]. E tabata konosí pa su bistanan original i kolorido di Kòrsou, den kual perspektiva no tabata relevante. Komo pintor naïef e ta okupá un lugá úniko den pintura na Kòrsou.
Ocalia tabata pinta hopi; ta estimá henter su obra riba 1000 pa 1500 pintura.[1] Den añanan 1960 el a kuminsa para dilanti muraya di Fort Amsterdam pa pinta i bende su obranan, mas tantu na turista. E tabata e promé yu di Kòrsou ku tabata gana su pan di kada día ku pintamentu.[4] Banda di esei e tabata traha obranan di arte ku materialnan manera palu of bleki. Na 1971 el a funda e Fundashon di Artista.[5]
Su promé eksposishon a tuma lugá na Lanthùis Bloemhof na 1965. Varios otro a sigui tambe internashonalmente, entre otro na Santo Domingo, Siudat di Mexico i New York.[1] Na 1988 i 1991 e tabatin eksposishonnan na Hulanda i Kòrsou, mientras na 1995 a tuma lugá un eksposishon individual ku 100 pintura den museo De Stadshof na Zwolle. No obstante esaki e tabata te despues di su morto ku Ocalia realmente a wòrdu rekonosí komo un pintor importante.[3] Awendia su arte ta representa den e kolekshonnan di Museo di Kòrsou, Sticusa i Museo Munisipal di Amsterdam.[6]
Na 1995 Sherman de Jesus a skirbi i produsi un dokumentario di e bida di Ocalia, den kual su nieto, Inchomar Ocalia, a hunga e papel di Ocalia komo mucha.[7] Na 1970 Ocalia mes a skirbi e storia di su bida, Mi Historia, ku el a regalá Maritza Coomans-Eustatia, kende despues a pasa esaki pa Archivo Nashonal Kòrsou.[4] E outobiografia aki tabata un di e fuentenan usá pa e buki biográfiko Ocalia Paints Curaçao / Ocalia schildert Curaçao (1995).
Ocalia tabata kasá ku Nono Ocalia; huntu nan tabatin yu. El a fayesé na 1984 na edat di 67 aña i ta derá den santana katóliko di Santa Maria.
Literatura[editá | editá fuente]
- Henriquez, Nicole & Römer-de Vreese, Jacqueline, Ocalia Paints Curaçao / Ocalia schildert Curaçao, Walburg Pers (1995)
Fuente, nota i/òf referensia
|