Tania Kross
- E artíkulo aki ta skirbí na papiamentu. Lo ta apresiá si por mantené e artíkulo aki na estilo di papiamentu.
| Tania Kross | ||
|---|---|---|
| ||
Tania Kross na lansamentu di wepsait U Aan Zet
| ||
| Informashon básiko | ||
| Nasementu | 3 ougùstùs 1976 Kòrsou
| |
| Obra | ||
| Género Musikal | Opera | |
| Ofishi | musiko, kantante di opera
| |
| Instrumento | bos
| |
| Tipo di bòs | Mezzosoprano | |
| Wèpsait ofisial (en) AllMusic-profil (en) Discogs-profil (en) IMDb-profil (en) MusicBrainz-profil | ||
Tania M. Kross (☆ 3 di ougùstùs 1976 na Kòrsou) ta un kantante di ópera di Kòrsou ku bos mezzosoprano.
Bida[editá | editá fuente]
Tania Kross a nase 3 di ougùstùs 1976 na Kòrsou. Su mama i su tata ambos tabata traha na refineria Shell.[1] E tabata alumno na MIL i tabata kanta den e koro eskolar.[2] Mas lat den e koro Crescendo di Frank Davelaar el a kuminsa mustra su talento pa kanta i a bai studia na Konservatorio di Utrecht i na e Opera Studio Internashonal na Amsterdam. Den su di dos aña di estudio, na 1993, e ta gana e promé premio di Stichting Jong Muziektalent.
Karera[editá | editá fuente]
Tania Kross su karera a kuminsá na Hulanda i a desaroyá pa gran parti na Oropa. Na 2003 el a representá Reino Hulandes den e konkurso di "BBC Singer of the World" na Cardiff, alkansando e ront final. Kross a keda elegí pa Koninklijke Concertgebouw na Amsterdam komo "rising star" di e temporada 2004/2005. Despues di a duna un resital den e sala chikitu di e Concertgebouw el a bai riba gira na diferente sala di konsierto, entre otro na Paris, Salzburg, Viena, Atenas, Birmingham, Colonia i Carnegie Hall na New York.
E kantante a partisipá na diferente produkshon di opera, entre otro na e Nederlandse Reisoper, e opera di estado na Hamburg, Hannover i Stuttgart. For di 2006 e tin su propio festival "Krossin'Gouda" na museo Gouda, kaminda diferente disiplina di arte ta topa. Na 2008, el a interpreta e rol di Carmen na e festival anual di opera na Glyndebourne, Inglatera. Tania Kross ta embahador di e depósito di instrumento di e "Leerorkest", un proyekto ku ta kolektá instrumentonan pa mucha.
Kross a animá Carel de Haseth pa adaptá su novela Katibu di Shon den e promé opera na papiamentu, e idioma di e islanan ABC. E tabata un di e tres persona ku a presentá e opera na Stadsschouwburg na Amsterdam dia 1 di yüli 2013, pa konmemorá e di 150 aniversario ku a pone fin na sklabitut den Karibe Hulandes.[3][4]
Na 1 di aprel 2015 el a wòrdu nombrá komo miembro di e Akademia di Arte na Hulanda. Na 2016 por a mir'é den e pelíkula Bon Bini Holland. Na 2017 el a partisipá na e programa di televishon Beste Zangers, komo e promé kantante di opera. Kross huntu ku aktor Tommie Christiaan a logra e promé lugá den e lista di iTunes, ku e kansion Barcelona ku nan a kanta huntu. Na aña 2019 Kross a partisipá den e programa di RTL 4 The Masked Singer, un kompetensia di kantamentu den kua e tabata disfrasá komo robot. El a sali ganadó di e kompetensia.[5]
Na 2022 Kross tabata inisiadó di un proyekto pa re-establesé un teatro na Kòrsou.[6] E isla tabatin un propio teatro, Sentro Pro Arte, ku tabata aktivo entre 1968 i 2001. Na 2016 e edifisio a bira un ruina despues di a pega kandela.
Tania Kross ta kasá ku Henkjan de Krijger i ta mama di dos yu hòmber.[7]
Na aña 2024 el a wòrdu kondekorá komo Kabayero ("Ridder") den Orden di Oranje-Nassau.[8]
Diskografia[editá | editá fuente]
Tania Kross tin tres cd's riba su nòmber. Su promé cd a risibí e premio di públiko di Edison Music Awards na Hulanda.
- Corazon: su promé cd ku Randal Corsen (piano), Esther Steenbergen (kitara), Ernst Munneke (piano), Roël Calister (perkushon) i e Matangi String Quartet.
- J.S. Bach: Mattheus Pashon BWV 244, tradusí na hulandes dor di e kantante Jan Rot (ku e "Residentie Orkest" bou di guia di Jos Vermunt i e koro di Bach).
- Arie Antiche (ku Marietta Petkova riba piano).
Premio[editá | editá fuente]
Promé premio di fundashon Jong Muziektalent Nederland (1995, 1997 i 1998)- Premio Kultural di 'Nederlandse Programma Stichting' (2000)
- Promé premio Cristina Deutekom Concours (2000)
Premio Boeli van Leeuwen 2013 − pa Katibu di Shon (huntu ku Randal Corsen i Carel de Haseth}- Premio Radio 4 (2014)
- Premio Johannes Vermeer (2023)[9]
Link eksterno[editá | editá fuente]
- Tania Kross
- Profil di Tania Kross na Akademia di Arte
- Tur kantante di Beste Zanger 2017